რადიო "პალიტრის" (FM 103,9) გადაცემა "შუადღის" ეთერში იურისტმა თათა ჩხეიძემ, როგორც პროფესიონალმა მძღოლმა, ცხოვრებისეული გამოცდილების ექსკლუზიური დეტალები "პალიტრის" მსმენელს გაუზიარა.
თათა ჩხეიძის ავტოპორტრეტი:
პროფესიით სამართლის დოქტორი, პროფესორი, კითხულობს ლექციებს სტუდენტებისთვის შესავალი სამართალმცოდნეობიდან, კონსტიტუციური სამართალი, მედიასამართალი. უთავმოყვარეო პროფესიონალი მძღოლი, რომელიც ქალაქში "ოფროუდის" ცნობილი ნივით დადის (ამ ეტაპზე საკმაოდ შელახულ მდგომარეობაშია), არ მოსწონთ ქალებს, მაგრამ ამაყობენ მამრი მძღოლები.
მანქანის მართვის ინტერესი
"ოჯახს ემსახურებოდა მძღოლი ბატონი კოტე. მაშინ 12-13 წლის ვიყავი. ყოველდღიურად ბატონ კოტესთან მოძრაობა ჩემთვის იყო ერთგვარი ტრაგედია, იმიტომ, რომ კოტე იჯდა საჭესთან და მე გვერდით ან უკან. ვუყურებდი ხელებსა და ფეხებზე, რას აკეთებდა, როდის გადართავდა პირველში, მეორეში, თან ვეკითხებოდი, რატომ დააჭირე კონუსს ფეხი, რატომ გადართე?.. ის ვერ ხვდებოდა, რატომ მიანტერესებდა ეს ყველაფერი.
პირველი კრიმინალი - ჩინოვნიკის დამტვრეული "ტრიციტადინი"
ერთ მშვენიერ დღეს, საკუთარ დაბადების დღეზე, საღამოს, როდესაც მამა, ბიძა და სხვა სტუმრები კარგად იყვნენ შეზარხოშებულები, ჩემს პატარა დეიდაშვილებს ვთხოვე, ეზოში ჩამომყევით-მეთქი. კრიმინალი ჩავიდინე, გასაღები მოვიპარე და სტუმრად მოსული ჩინოვნიკის თეთრ "ტრიციტადინში" ჩავჯექი. "ზადნით" მომიწია წასვლა და ამ "ზადნიმ" გამოიწვია ის, რომ მეზობლის ჭიშკარს ავეკარი ამ სამთავრობო მანქანით.
ამას მოჰყვა ძალიან დიდი სკანდალი. პრობლემა იყო იმის დამტკიცება, რომ ეს ყველაფერი მე ჩავიდინე და წარმოიდგინეთ, მთავრობაში რა ამბავი ატყდა. რადგან ოქმში იწერებოდა, რატომ და როგორ დაზიანდა მანქანა. ამ ფაქტის გამო ძალიან სასტიკად დავისაჯე.
ჩუმად ნაყიდი მანქანა და 2-წლიანი დუმილი
1995-96 წლებია, როდესაც ძალიან ცოტა რადიოსადგური არსებობდა, მაგრამ ძალიან კარგი ხელფასები იყო. მე რადიოში ვმუშაობდი. ორი წლის ნაგროვები თანხით, 17 წლის ასაკში ვიყიდე და მამიდაშვილის სახელზე გავაფორმე "პერეხადაში" BMW.
მანქანა მყავდა ძალიან მოწესრიგებული და მოვლილი. დაახლოებით ორი წლის მანძილზე წარმოდგენა არ ჰქონდათ ოჯახის წევრებს და ნათესავებს, გარდა ჩემი მამიდაშვილისა, რომ მე მყავდა მანქანა. მანქანას სახლიდან დაახლოებით ერთი კილომეტრის მოშორებით, საქვაბის მიმდებარე ტერიტორიაზე ვაჩერებდი. ამ პერიოდს დაემთხვა ჩემი სტუდენტობა. სტუდენტობაშიც პირველი გოგო ვიყავი, ვინც საკუთარი მანქანით დადიოდა.
მართვის მოწმობა "გაშიშვლებული" ფოტოთი
იმ პერიოდში მართვის მოწმობის ასაღებად საჭირო იყო მხოლოდ სურათის გადაღება. ფოტოს როცა ვიღებდი, მეცვა რაღაცნაირი მაისური, რომელიც კისერთან ცუდად ჩანდა. ფოტოგრაფმა მთხოვა, რომ მაისური ცოტათი შემესწორებინა.
იმდენად გადავიწიე დეკოლტე, რომ ფოტო რომ გადამიღეს, გამოვჩნდი აბსოლუტურად შიშველი. დღესაც ამართლებს ეს მოწმობა. მთელი საპატრულო პოლიცია ამ ფოტოს ნახვის შემდეგ ცდილობს, არ დამაჯარიმოს. სულ მეკითხებიან, რატომ ვარ ასეთ მდგომარეობაში მართვის მოწმობის ფოტოზე.
შეყვარება ანგარებით
მას შემდეგ, რაც "ტრიციტადინი" დავამსხვრიე, თუკი ვინმე შემყვარებია, მხოლოდ ანგარებით. ჩემს რჩეულს აუცილებლად უნდა ჰყოლოდა მანქანა. "06", "03", "01"-იც იყო ჩემი თაყვანისმცემლების კოლექციაში, საბოლოოდ კი უკეთესი მოდელის მანქანაზე ”გავთხოვდი” (იცინის).
რა ბედი ეწია "საიდუმლო" BMW-ს?
კახეთში საქეიფოდ მიმავალ ბიჭებს ვათხოვე ჩემი მანქანა. უკან დაბრუნებულებმა გასაღებიც კი არ ჩამომიტანეს. მითხრეს, რომ გვეგონა, მანქანა გორდებოდა და გადმოვხტითო, მანქანა კი ხევში გადააგდეს. თან მანიპულირებდნენ იმით, რომ მე ამაზე ვერაფერს ვეტყოდი, რადგან სახლში რომ მეთქვა, მანქანა დამიმტვრიესო, ეს ცალკე სკანდალი იქნებოდა. შესაბამისად, არც ამინაზღაურდა ეს ზარალი.
ოჯახის ნაჩუქარი მანქანა და ნაჯახით დამტვრეული მატერიალური სიკეთე
ოჯახმა მანქანით დამასაჩუქრა. ნახეს, რომ მართლაც კარგად ვატარებდი. გაფრთხილებული ვიყავი, რომ მანქანა უნდა მეტარებინა დღისით და საღამოს სახლში უნდა ვყოფილიყავი.
ერთ მშვენიერ დღეს ჩვენი მძღოლი ბატონი კოტე მივიდა მამაჩემთან და უთხრა, რომ თქვენი ქალიშვილი მცხეთის გზაზე მანქანაში სავსე გოგონებით 140 სიჩქარით მიჰქროდა და სადღაც სალობიესკენ გადაუხვიაო.
რა თქმა უნდა, მე არაფერი ვიცი. მოვდივარ სახლში, მამა შესვენებაზეა მოსული და მეუბნება, საყოფაცხოვრებო ნივთები სად გვაქვს, ნაჯახი გვჭირდებაო. მე ჩავყევი სარდაფში, ავიღე ნაჯახი, ამოვედით ისევ ეზოში… გაკვირვებული ვუყურებ… მამა მივიდა მანქანასთან და ერთი ხელის მოსმით ”კაპოტის” წინა მხარეს მთელი ძალით დაარტყა. მე ვიფიქრე, რომ მამა ფსიქიურად შეიშალა…იგივე ჩაიდინა კარებებზე. კარგად მიანჯღრ-მოანჯღრია მანქანა და მეუბნება: თათა, შვილო, მომისმინე და შეხედე, როგორ დაიკუჭა. რომ გავაგრძელო, კიდევ უფრო დაიკუჭება. ეს არის მატერიალური სიკეთე, მაგრამ შენ ჩემთვის მატერიალური სიკეთე არ ხარ. – ასე დამსაჯა მამამ. ამის შემდეგ დავრჩი უმანქანოდ 2 წლის მანძილზე და ამიტომაც იმ პერიოდში გავთხოვდი (იცინის).
რჩევები ახალბედა მძღოლებს:
მაგალითად: ქალს არ შეუძლია სწრაფი მანევრირება და რატომ? ფიქრობს და მერე აკეთებს. პირველ რიგში, უნდა ეცადო, სავარძელი ახლოს არ გქონდეს საჭესთან მიბჯენილი.
2. ექსტრემალურ სიტუაციაში არასდროს წაიკითხო ტვინში თეორია და მერე არ იმოქმედო. ამაში დიდი დრო დაგეხარჯება.
”ოფროუდის” ორგზის გამარჯვებული და წინასწარ გათვლილი პრიზი?!
მეგობარმა ბიჭებმა მასწავლეს დიაგონალებზე მანქანის მართვა. როდესაც ”ოფროუდის” კლუბი შეიქმნა, მითხრეს, თუ შეგიძლია მიიღო მონაწილეობაო. მე დავთანხმდი. ორი გამარჯვება მაქვს, მაგრამ ერთი არ ჩამითვალეს. იმიტომ, რომ რაღაც მომენტში შეურაცხყვეს საკუთარი პროფესია. 49 მამაკაცს ქალმა რომ მოგვიგო, ეს რომ ეთერში გამოვაცხადოთ, სირცხვილი იქნებაო და დისკვალიფიკაციაზე წავედი.
მეორე წელს შეჯიბრი იგივე შედეგით დასრულდა და დამაჯილდოვეს პრიზით, რომელმაც დიდი გაკვირვება გამოიწვია.
პრიზი იყო ლაზერული ეპილაციის ვაუჩერი. საინტერესოა, მამაკაცს რომ გაემარჯვა, როგორ გამოიყენებდა ამ პრიზს?! ამის შემდეგ შეჯიბრში მონაწილეობა არ მიმიღია. ალბათ, ინტერესი დავკარგე.
იხილეთ ვიდეო: "შუადღე" - თემა: ქალი მძღოლები
მოამზადა ნანა ჩხაიძემ
